Frambjóðandi repúblikana réðst á blaðamann

Frambjóðandi repúblikana til sætis í fulltrúadeild Bandaríkjaþings fyrir hönd Montana fylkis, Greg Gianforte, réðst á Ben Jacobs, blaðamann Guardian og skellti honum í gólfið með þeim afleiðingum að gleraugun hans brotnuðu. Þingmaðurinn hefur verið kærður fyrir líkamsárás. Atvikið náðist á hljóðupptöku sem heyra má hér að neðan. 

Frambjóðandinn var í viðtali við blaðamanninn og var Jacobs að spyrja hann spurninga út í heilbrigðisfrumvarp Donald Trump, Bandaríkjaforseta, þegar frambjóðandinn virðist hafa þrotið þolinmæðin og skellti honum í gólfið. Jacobs tilkynnti atvikið til lögreglu.

„Hann skellti mér bara í jörðina,“ segir Jacobs en flytja þurfti blaðamanninn á sjúkrahús eftir árásina. „Ég held hann hafi svo gólað á mig einu sinni eða tvisvar....ég held hann hafi líka kýlt mig. Þetta er það furðulegasta sem ég hef lent í á starfsferlinum.“

Í tilkynningu frá kosningaskrifstofu Gianforte segir að blaðamaðurinn beri sjálfur ábyrgð á því sem gerðist þar sem hann hafi „komið sér inn á kosningaskrifstofu frambjóðandans án leyfis og þrýst upptökutæki í andlitið á frambjóðandanum.“ Blaðamaðurinn hafi neitað að yfirgefa svæðið.

Jacobs hefur þvertekið fyrir nokkuð slíkt og segir hann að honum hafi aldrei verið gert að yfirgefa svæðið. Hljóðupptakan sanni það.