Fín byrjun á fyrsta degi í Hítarvatni

Hítarvatn er geysilega skemmtilegt veiðivatn enda umhverfið fagurt og við réttar aðstæður getur veiðin verið ekkert minna en frábær.

Veiðin hefst í vatninu síðustu helgi í maí á hverju ári svo fyrsti dagurinn sem veiða má í vatninu er í dag.  Það var svo sem ekki reiknað með fjölmenni en veiðifélagar sem Veiðivísir hefur heyrt í í dag sögðust ekki hafa hitt neinn þegar þeir mættu eldsnemma í morgun.  Veður er eins og það verður best á kosið en það varla hreyfir vind inní dalnum.  Það er skýjað og dropaði aðeins úr lofti þannig að það er varla hægt að biðja um betra veður.  Það sem þó óumflýjanlega fylgir þessum skilyrðum er mikil fluga og það þarf að minna veiðimenn sem ætla að kíkja í Hítarvarn að hafa með sér flugnanet.

Hvað veiðina varðar hefur morguninn gengið vel og á rétt fjórum tímum hafa þrír veiðimenn fengið hátt í 30 fiska, mest urriða en nokkrar bleikjur líka.  Mest af fiskinum er um 1-2 pund en tveir stórir urriðar fengust fljótlega í morgun og voru þeir báðir um 55 sm langir og sleppt að viðureign lokinni.  Öll veiðin er á litlar þyngdar púpur og hafa Watson Fancy, Killer, Alma Rún og Peaocock gefið mest.