Tveir af efnilegustu handboltamönnum landsins fengu báðir 10 fyrir frammistöðuna í gær

Tveir ungir framtíðarlandsliðsmenn Íslands voru í aðalhlutverki í fjórða leik FH og Vals um Íslandsmeistaratitilinn í Olís-deild karla í handbolta sem fram fór í Valshöllinni á Hlíðarenda í gær.

FH-ingar fögnuðu fimm marka sigri í leiknum, 30-25, og það verður því hreinn úrslitaleikur um Íslandsmeistaratitilinn í Kaplakrika á sunnudaginn kemur.

FH-ingurinn Gísli Þorgeir Kristjánsson og Valsmaðurinn Ýmir Örn Gíslason hafa heillað marga handboltaáhugamenn með frammistöðu sinni í vetur og með því sýnt að þeir geta náð langt í þessari íþrótt.

Ýmir Örn blómstrar helst í vörninni en Gísli í sókninni. HB Statz tók saman tölfræði úr leiknum í gærkvöldi eins og í fyrri leikjum úrslitaeinvígisins og þar komu þessir tveir ungu strákar afar vel út.

Þeir fengu nefnilega báðir tíu fyrir frammistöðu sína hjá HB Statz, Gísli fékk tíu fyrir sóknarleikinn en Ýmir tíu fyrir varnarleikinn.

Gísli Þorgeir Kristjánsson skoraði 8 mörk úr aðeins 10 skotum í leiknum en eins átti hann 4 stoðsendingar og fiskaði að auki þrjú vítaköst. Gísli tapaði reyndar 4 boltum en kom með beinum hætti að 15 mörkum FH-liðsins. Hann átti einnig fimm mögulegar stoðsendingar að auki þar sem liðsfélagar hans nýttu ekki færin sín.

Ýmir Örn Gíslason náði tíu löglegum stöðvunum í leiknum en hann stal alls fjórum boltum af FH-ingum í leiknum. Ýmir nýtti reyndar bara 2 af 7 skotum sínum en hann fiskaði 3 vítaköst eins og Gísli.

Það er hægt að skoða tölfræði HB Statz úr leiknum í gærkvöldi með því að smella hér.

Besti sóknarmaður vallarins í leik 4 (frá HB Statz):

Gísli Þorgeir Kristjánsson, FH 10,0

Josip Juric Gric, Val 9,2

Ólafur Ægir Ólafsson, Val 8,4

Ásbjörn Friðriksson, FH 7,6

Einar Rafn Eiðsson, FH 7,4

Ísak Rafnsson, FH 7,1

Besti varnarmaður vallarins í leik 4 (frá HB Statz):

Ýmir Örn Gíslason, Val 10,0

Arnar Freyr Ársælsson, FH 7,3

Orri Freyr Gíslason, Val 6,9

Ísak Rafnsson, FH 6,7

Jóhann Karl Reynisson, FH 6,7

Alexander Örn Júlíusson, Val 6,7