Lóðrétt setur strik í reikning atvinnurekenda

Ný reglugerð um drykkjarvöruumbúðir sem taka á gildi 1. júní getur sett innflutning á drykkjarvörum í uppnám að mati Félags atvinnurekenda. Í reglugerðinni, sem samin er í umhverfis- og auðlindaráðuneytinu, er gerð sú krafa að strikamerki á drykkjarvöruumbúðum verði lóðrétt en ekki lárétt.

FA segir þetta skapa viðskiptahindrun sem sé algjörlega órökstudd. Félagið andmælir breytingunni og slíkt hið sama hafa evrópsk samtök áfengisframleiðenda gert. Strikamerki á drykkjarvöruumbúðum eru ýmist lóðrétt eða lárétt.

Flestar léttvínsflöskur og flöskur með sterku áfengi eru með láréttu strikamerki en það er mismunandi með bjórtegundir og gosflöskur. Á þeim tegundum sem eru innfluttar sér erlendi framleiðandinn um að setja strikamerkið á vöruna.

Vegna smæðar markaðarins er nánast útilokað að erlendir framleiðendur myndu fást til að sérmerkja þær vörur sem flytja ætti til Íslands svo krafa reglugerðarinnar yrði uppfyllt. Þá yrðu innflytjendur að endurmerkja allar flöskur með ærnum tilkostnaði og vinnu.

Ljóst er að sá kostnaður myndi að endingu lenda á neytendum með hærra vöruverði segir í frétt á vef Félags atvinnurekenda. Þar kemur fram að frestur til að gera athugasemdir renni út þann 23. maí og ljóst sé nú þegar að reglugerðin muni ekki taka gildi þann 1. júní, því hafi verið frestað. Óljóst sé þó hvort ákvæðið er varðar lóðréttu strikin haldi sér í nýju reglugerðinni þegar hún tekur gildi.