Kristófer leikur í appelsínugulu í sumar

Kristófer Páll Viðarsson hefur verið lánaður til Fylkis í Inkasso-deildinni.

Kristófer var lánaður frá Víkingi R. til KA fyrr í vetur en er nú kominn til Fylkis sem féll úr Pepsi-deildinni í fyrra eftir 16 ára samfellda dvöl þar.

Kristófer er uppalinn hjá Leikni F. en gekk í raðir Víkings 2015. Hann spilaði hins vegar sem lánsmaður með Leikni 2015 og 2016.

Í fyrra skoraði Kristófer 10 mörk í 22 leikjum fyrir Leikni í Inkasso-deildinni, þar af fjögur í lokaumferðinni þar sem Leiknismenn björguðu sér frá falli á ævintýralegan hátt með 2-7 sigri á HK.

Kristófer gæti leikið sinn fyrsta leik með Fylki í dag þegar liðið tekur á móti Vatnaliljum í 64-úrslitum Borgunarbikarsins.

Fylkir fær Þór Ak. í heimsókn í 1. umferð Inkasso-deildarinnar 6. maí næstkomandi.