Aðeins 11 dagar í fyrsta veiðidaginn

Stangveiðitímabilið hefst 1. apríl en þá opna nokkur af vinsælustu sjóbirtingssvæðum landsins en veiði hefst einnig á sama degi í nokkrum vötnum.

Þð er þó ekki útséð með að hægt verði að veiða í öllum þeim vötnum sem opna fyrir veiði 1. apríl vegna þess að nokkur ís á er mörgum þeirra.  Það lítur hins vegar ágætlega út með veður í lok þessarar viku en þá á að fara hlána nokkuð hressilega á vesturlandi og við þær aðstæður er ísinn fljótur að hopa.  Margir veiðimenn sitja aðeins á sér með að bóka veiði á sjóbirtingssvæðin fyrr en veðurspáin sýnir betur hvernig veður er í aðsigi í kringum opnunardagana en það reynir mikið á þolinmæði og úthald ef það er kalt og blæs á menn í þokkabót.

Það virðist vera eitthvað framboð á leyfum á nokkur vinsæl svæði þó auðvitað séu helgarnar margar hverjar löngu seldar.  Þeir sem ætla að skoða lausa daga ættu að kíkja á sölusíður veiðileyfasala og sjá hvort það sé ekki eitthvað laust á dögum sem henta því eins og veiðimenn þekkja er oft mikil sala á lausum dögum eftir að svæðin opna ef veðurspáin er hagstæð.

Meðal vatna sem opna fyrir veiði 1. apríl má t.d. nefna Gíslholtsvatn (ef vatnið er íslaust), Hraunsfjörður, Sauðlauksvatn (ef vatnið er íslaust), Syðridalsvatn, Vífilstaðavatn, Þveit, Geitabergsvatn, Eyrarvatn og Þórisstaðvatn en þessi vötn sem hér eru upptalin eru öll í Veiðikortinu.