Los Angeles umferðarþyngsta borg heims

Los Angeles er borg englanna en það telst seint guðdómlegt að aka um borgina því hún mælist sú borg heimsins sem er umferðarþyngst. Íbúar hennar eyða 104 klukkustundum á ári í það að mæna á stuðarann á næsta bíl fyrir framan án þess að hreyfast. Í öðru sæti á þessum lista er Moskva, en aðrar tvær bandarískar borgir, New York og San Francisco í þriðja og fjórða sæti og kólombíska borgin Bogotá er í því fimmta.

Meðal bandaríkjamaðurinn eyðir 42 klukkustund í umferðarteppu á ári, eða um 7 mínútum á dag, en í tilfelli Los Angeles-búa eru það 17 mínútur á dag. Umferðarþyngsta landið í heiminum er samt ekki Bandaríkin því þar á Tæland vinninginn með 61 klukkustund á ári, eða 10 mínútur á dag.

Umferðarteppur eru ekki bara leiðinlegar heldur kosta þær mikið. Þær auka mjög eyðslu bíla og sóa tíma fólks sem það annars gæti notað til vinnu eða frítíma. Þær auka einnig mikið á mengun, svo það er til mikils að vinna að losna við umferðarteppur.

INRIX, sem sér um þessar mælingar áætla að hver klukkutími í umferðarteppu í Bandaríkjunum kosti á milli 1.400 til 2.800 króna. Ástandið í Bandaríkjunum fer síversnandi og er því spáð að umferðarteppur muni kosta Bandaríkjamenn 2.800 milljarða dollara á ári frá og með árinu 2030. Það verður að teljast mikið fé.