Tesla hefur framleiðslu á Model 3 þann 20. febrúar

Góðar fréttir fyrir þá 400.000 einstaklinga sem fyrirfram hafa pantað sér ódýrasta bíl Tesla frá upphafi bárust úr herbúðum Tesla því stutt er í framleiðslu fyrstu bílanna. Þar á bæ er stefnt að því að hefja framleiðsluna eftir um 40 daga, eða þann 20. febrúar.

Allra fyrstu bílarnir sem framleiddir verða verða notaðir til að prófa framleiðslulínuna og þessir fyrstu bílar notaðir til prófana. Þar sem saga Tesla er stráð framleiðsluseinkunum skal taka örlítinn fyrirvara á þessum heimildum frá Tesla.

Framleiðsla á rafhlöðum þeim sem notaðar verða í Tesla Model 3 bílinn er hafin í risarafhlöðuverksmiðju Tesla í Nevada og því ætti fátt að vera því til fyrirstöðu að framleiðsla verði hafin á bílnum á þessari tilteknu dagsetningu.

Lokahönnun bílsins á að vera yfirstaðin fyrir nokkrum mánuðum síðan og það væri ekki nema fyrir þær sakir að Tesla geri einhverjar lokabreytingar á bílnum sem þessi dagsetning ætti ekki að standast.