Kia Optima tengiltvinnbíll og langbakur frumsýndir

Kia byrjar nýja árið af krafti eins og það endaði síðasta ár eftir að hafa náð öðru sætinu yfir mest seldu bílamerkin á Íslandi. Tvær nýjar útfærslur úr Optima-línu Kia verða frumsýndar hjá Bílaumboðinu Öskju nk. laugardag 14. janúar kl. 12-16. Um er að ræða Optima Plug-In-Hybrid og Optima Sportswagon.

Optima í Plug-In-Hybrid útfærslu er búinn tvinnvél sem samanstendur af rafmótor og 2,0 lítra bensínvél. Þannig sameinar bíllinn kosti umverfisvæna sparneytni rafbílsins og kraft bensínvélarinnar. Tvinnvélin skilar alls 205 hestöflum og eyðslan er aðeins frá 1,6 lítrum á hundraðið.

Drægni bílsins á rafmagninu eingöngu er 54 km við bestu aðstæður. Optima er fyrsti Plug-In-Hybrid bíllinn frá Kia og því sannkallaður tímamótabíll frá suður-kóreska bílaframleiðandanum. Bílinn má hlaða í venjulegri 220v heimilisinnstungu eða heimahleðslustöð. Hleðslutími er um tvær og hálf klukkustund í heimahleðslustöð og um fimm klukkustundir í venjulegri heimilisinnstungu.

Optima Sportswagon er rúmbetri útgáfa af hinum sígilda Optima. Hinn nýi Sportswagon býður upp á meira farangurspláss og er ríkulega búinn öryggis- og þægindabúnaði sem tryggja framúrskarandi akstur. Bíllinn er með 1,7 lítra dísilvél sem skilar 141 hestafli og eyðslan er frá 4,4 lítrum á hundraðið. Báðar gerðirnar eru að sjálfsögðu með 7 ára ábyrgð eins og allir nýir Kia bílar en enginn bílaframleiðandi býður upp á jafn langa ábyrgð á bílum eins og Kia.