97 ára Svíi kaupir Mustang GT

Það verður enginn of gamall til að leika sér og uppfylla langþráða drauma. Það á sannarlega við Svíann Lennart Ribring sem keypti sér Ford Mustang GT um daginn og endurnýjaði með því kynnin af slíkum bíl, því fyrir 50 árum gerði hann slíkt hið sama.

Lennart var einn fyrsti Svíinn sem keyptu sér Mustang fyrir hálfri öld síðan og hefur ást hans á bílnum aldrei minnkað síðan, en nú var bara kominn tími til að fá sér einn nýjan. Ford Mustang GT er 435 hestafla bíll með sinni 5,0 lítra V8 vél og því ætti hinn aldraði Svíi að komast vel úr sporunum.

Í myndskeiðinu hér að ofan má sjá þegar Lennart sækir bíl sinn til Ford í Svíþjóð og þegar hann tekur son sinn í bíltúr á nýja bílnum, en sonur hans er reyndar ekkert unglamb heldur. Lennart kenndi einmitt syni sínum að aka bíl á gamla Mustang bílnum. Ekki slæmur pabbi þar.