Virtasti dómari Íslands um sigurmarkið: „Við höfum notið góðs af því að vera loksins orðin stór“

Kristinn Jakobsson, virtasti knattspyrnudómari Íslands og sá sem hefur náð lengst í alþjóða dómgæslu, segir hans fyrstu viðbrögð við sigurmarki Íslands gegn Finnum á Laugardalsvelli í gærkvöldi vera þau að dæma mark. Þetta sagði hann í samtali við blaðamann í gærkvöldi.

Dómarinn geðþekki hafði skoðað markið út frá nokkrum sjónarhornum í myndbandakerfi evrópska knattspyrnusambandsins en þar geta dómarar farið yfir atvik eftir á. Hann reyndi að beiðni Vísis að setja sig í spor dómarans, Sveins Oddvar Moen frá Noregi, í sókninni þýðingarmiklu þegar Ísland skoraði sigurmarkið.

Sjá einnig:Villandi skjáskot gengur um á netinu en staðfestir ekkert 

„Hann á mjög erfitt með að sjá það. Hann verður að fylgja ráðleggingum frá aðstoðardómaranum. Ég er pottþéttur á að aðstoðardómarinn hafi sagt honum að boltinn hafi verið kominn inn fyrir,“ segir Kristinn.

Ofboðslega erfiðar aðstæður

Sitt sýnist hverjum um augnablikið þegar Ragnar Sigurðsson er í baráttunni um boltann eftir skalla Kára Árnasonar. Einhvern veginn hrekkur boltinn af Ragnari í átt að marki og svo er hann ýmist „augljóslega inni“ eða „augljóslega ekki inni.“

„Auðvitað er þetta ofboðslega erfiðar aðstæður,“ segir Kristinn sem upplifað hefur tímana tvenna við dómgæslu hér á landi og á stórum vettvangi erlendis. 

Sjá einnig:Nýtt sjónarhorn sýnir að boltinn var ekki kominn inn

Lengi vel var uppi óvissa um það hvort markið hefði verið dæmt eftir að Alfreð Finnbogason spyrnti boltann yfir línuna þar sem finnski markvöðurinn hélt honum á línunni. UEFA hefur staðfest að markið er skráð á Ragnar Sigurðsson. Það er markið sem dómarinn dæmir. Hann staðfestir það í samstarfi við starfsmanna UEFA í stúkunni og eftirlitsdómarann. 

Gerðist hratt

Hlutirnir gerðust hratt þegar Ísland skoraði. Þjálfari Finnanna vildi fá dæmda rangstöðu á Ragnar, taldi boltann ekki inni og vildi fá brot á Alfreð þar sem finnski markvörðurinn hafði hönd á bolta.

„Að hafa control á bolta er ekki að hafa litla putta á bolta,“ segir Kristinn um augnablikið þegar Alfreð spyrnir boltanum yfir línuna.

„Þegar ég skoða þetta aftur þá get ég alveg stutt það að dómarinn hefði getað dæmt á þetta,“ segir Kristinn. Hann gæti sömuleiðis stutt það að ekki hafi verið fullkomið vald á boltanum og því ætti mark Alfreðs, hefði boltinn ekki verið inni hjá Ragnari, að standa. Jafnómögulegt sé að fullyrða með vissu um að markið hafi verið ólöglegt og að dómarinn hafi gert mistök. 

Aðspurður um mögulega hendi á Ragnar segist Kristinn ekki geta séð það. Dómarinn þurfi að geta séð það og enginn leið til að sjá það. Varðandi rangstöðuna þá sé það meira spurningamerki, þ.e. á Ragnar eftir að Kári skallar boltann áfram.

Ísland orðið „stórt“

„Tilfinningin var að þetta væri rangstaða,“ segir Kristinn. „En maður hefur upplifað svo margar svona rangstöður, maður hefur alltaf efann á bak við. Ef það er eitthvað ef, þá lætur maður leikinn ganga.“

Eftir að dómarinn dæmir mark rífur fyrirliði Finna í norska dómarann, hegðun sem allajafna uppsker rautt spjald. Það er kannski til marks um hið erfiða augnablik dómarans að hann sleppti honum með gult spjald enda vafalítið í mikilli óvissu um hvort ákvörðunin, að dæma mark hafi verið rétt.

Kristinn segir það spila inn í ákvörðun dómarans að karlalandslið Íslands sé komið á háan stall.

„Við höfum notið góðs af því að vera loksins orðin stór,“ segir Kristinn. Áður hafi stórar ákvarðanir yfirleitt ekki fallið með Íslandi en í þessu tilviki hafi Ísland notið vafans.

„Burtséð frá því hvort ákvörðunartakan er rétt eða röng, þá er alltaf stór vafi í þessari ákvörðunartöku,“ segir Kristinn. Ekkert sjónarhorn af markinu sé fullkomið. 

Uppfært klukkan 09:05

Nýtt sjónarhorn virðist sýna að boltinn var ekki allur kominn yfir marklínuna.

Sjá hér.