Hermann Hreiðarsson hættur með Fylki

Hermann Hreiðarsson hefur hætt þjálfun knattspyrnuliðs Fylkis sem féll úr Pepsi-deild karla í sumar. Fylkir sendi út tilkynningu þess efnis rétt í þessu.

Stjórn knattspyrnudeildar Fylkis og Hermann sendu sameiginlega út fréttatilkynningu þar sem segir að það hafi verið sameiginleg ákvörðun stjórnarinnar og Hermanns að hann skildi láta af störfum sem þjálfari liðsins.

Fylkir var í fallsæti nær allt tímabilið og féll að lokum í síðustu umferðinni þegar liðið tapaði fyrir KR á útivelli 3-0.

Hermann tók við liðinu á miðju tímabili í fyrra en liðið náði sér ekki á strik undir hans stjórn í sumar og leikur í Inkasso-deildinni á næstu leiktíð.



Fréttatilkynning Fylkis:

Knattspyrnudeild Fylkis og Hermann Hreiðarsson hafa sameiginlega komist að samkomulagi að hann láti að störfum sem þjálfari karlaliðs félagsins.

Hermann tók við liðinu á miðju tímabili í fyrra.

Knattspyrnudeild Fylkis langar að þakka Hermanni fyrir hans framlag til félagsins en hann hefur verið frábær félagsmaður og gert margt gott fyrir félagið. Knattspyrnudeild Fylkis óskar Hermanni velfarnaðar í framtíðinni.

Hermann vill koma á framfæri þökkum, þá fyrst og fremst til leikmanna, stjórnar og þjálfarateymis fyrir frábært samstarf. Tímabilið hafi ekki endað eins og til var ætlast en umgjörð og stuðningur hafi verið til fyrirmyndar. Fylkir er frábær klúbbur sem á heima í efstu deild og með stuðning leikmanna, stjórnar og síðast en ekki síst stuðningsmönnum félagsins þá verður félagið komið aftur þangað áður en langt um líður.



Baráttukveðja,

Hermann Hreiðarsson