Aston Martin, Rolls Royce, Bentley og Lamborghini skrópa í París

Talsvert færra verður af lúxusbílaframleiðendum á bílasýningunni í París en oftast nær. Sýningin hefst um næstu mánaðarmót og forföllin eru fleiri því fjöldaframleiðendurnir Ford og Volvo verða þar ekki heldur.

Bentley og Lamborghini eru bæði í eigu Volkswagen og þar á bæ er reynt að spara sem mest vegna dísilvélasvindlsins og til að eiga fyrir öllum sektunum. Auk þess segjast þeir Bentley-menn vilja leggja fremur áherslu á smærri sýningar og hjá Lamborghini er verið að endurhugsa framtíðaráformin og því ekki rétti tíminn til að sýna nýja bíla.

Á síðustu bílasýningu í París árið 2014 komu 1,25 milljón gestir og þótti sýningin þá afar vel heppnuð. Ekki er víst að það verði uppá teningnum núna, en dýru lúxusbílamerkin hafa ávallt mikið aðdráttarafl. Fastlega má búast við því í ár að rafmagnsbílar steli senunni þar sem flestir bílaframleiðendur munu sýna slíka bíla þar, bæði hreinræktaða rafmagnsbíla og tengiltvinnbíla.