Stóri Sam tók við enska landsliðinu af Roy Hodgson eftir að England féll óvænt úr leik fyrir Íslandi í 16-liða úrslitum á EM í Frakklandi í sumar.
Allardyce náði þó aðeins að stýra enska liðinu í einum leik, 0-1 útisigri á Slóvakíu. Uppljóstranir The Telegraph í fyrradag gerðu honum nær ómögulegt að vera áfram í starfi og svo fór að Allardyce hætti í gær, eftir aðeins 67 daga í draumastarfinu.
En hver verður næsti þjálfari enska landsliðsins? Gareth Southgate tók við liðinu til bráðabirgða og mun stýra því út þetta ár, í alls fjórum leikjum. Hvað gerist eftir það er hins vegar ekki vitað.
Vísir fór yfir þá einstaklinga sem eru líklegastir til að taka við enska landsliðinu samkvæmt veðbönkum.
46 ára Englendingur
Þjálfari enska U-21 árs landsliðsins
Efstur á blaði veðbanka. Southgate hafði ekki áhuga á landsliðsþjálfarastarfinu í sumar en ákvað að taka starfið að sér tímabundið eftir að Allardyce hætti.
Southgate hefur þjálfað enska U-21 árs landsliðið síðan 2013 og er innanbúðarmaður hjá enska knattspyrnusambandinu. Hann þekkir starfið út og inn og hefur unnið með mörgum af yngri leikmönnum A-landsliðsins.
Undir stjórn Southgates mistókst enska U-21 árs liðinu að komast upp úr riðlakeppninni á EM 2013 og 2015. Árangur Southgate með Middlesbrough var heldur ekki merkilegur, liðið féll vorið 2009 og þá um haustið fékk hann svo sparkið.
55 ára Englendingur
Án starfs
Kom til greina sem arftaki Hodgsons og ræddi við enska knattspyrnusambandið um möguleikann á að taka við landsliðinu.
Bruce býr yfir mikilli reynslu og hefur þjálfað nær samfleytt frá árinu 1998. Hefur aldrei þjálfað stórlið og sigurhlutfall hans í ensku úrvalsdeildinni er aðeins 28,1%. Kom Birmingham og Hull City upp í úrvalsdeildina og fór með síðarnefnda liðið í bikarúrslit fyrir tveimur árum.
Bruce er án starfs eftir að hafa hætt hjá Hull í sumar. Hann hefur einnig verið orðaður við stjórastarfið hjá Stoke.
55 ára Englendingur
Stjóri Crystal Palace
Sagði í sumar að hann væri ekki tilbúinn til að taka við enska landsliðinu. Spurningin er hvort eitthvað hafi breyst á þeim tíma.
Pardew hefur þjálfað í 17 ár með sæmilegum árangri. Hann fór með West Ham United og Crystal Palace í bikarúrslit og kom Newcastle United í Evrópukeppni.
Pardew er hins vegar óheflaður og umdeildur maður sem er kannski það síðasta sem enska landsliðið þarf í dag. Fékk þriggja leikja bann fyrir að skalla David Meyler, leikmann Hull, í mars 2014.
38 ára Englendingur
Stjóri Bournemouth
Efnilegasti enski stjórinn í bransanum og hefur náð frábærum árangri með Bournemouth. Kom liðinu upp í ensku úrvalsdeildina í fyrra og hélt því nokkuð þægilega uppi á síðasta tímabili.
Howe er þekktur fyrir að láta lið sín spila skemmtilegan fótbolta og predikar sóknarleik.
Hann er hins vegar aðeins 38 ára gamall og reynslulítill. Óvíst er hvort hann myndi vilja taka svona stórt starf að sér á þessum tímapunkti á ferlinum.
58 ára Englendingur
Án starfs
Var frábær leikmaður á sínum tíma og stýrði enska landsliðinu með góðum árangri á árunum 1996-99. Þurfti að segja af sér vegna ummæla sinna um að fatlaðir væru að gjalda fyrir syndir sínar í fyrra lífi.
Þjálfaraferill Hoddles byrjaði vel lofaði mjög góðu en það rættist ekki úr honum.
Hoddle hefur ekki stýrt liði í áratug en á þó sína stuðningsmenn sem vilja sjá hann taka aftur við enska landsliðinu.
52 ára Þjóðverji
Þjálfari bandaríska landsliðsins
Leiddi þýska knattspyrnusambandið inn í nútímann og undir hans stjórn lenti Þýskaland í 3. sæti á HM á heimavelli fyrir 10 árum.
Stoppaði stutt við hjá Bayern München og hefur átt misjöfnu gengi að fagna með bandaríska landsliðið síðan hann tók við því 2011.
Klinsmann nýtur virðingar á Englandi eftir tíma hans sem leikmaður með Tottenham Hotspur. Hann býr enn í Bandaríkjunum og ku hafa lítinn áhuga á að flytjast til Evrópu sem vinnur væntanlega gegn honum.
