Lést eftir að lögreglan skaut hann með rafbyssu

Dalian Atkinson, fyrrum leikmaður Aston Villa, lést í morgun en lögreglan beitti rafbyssu til þess að róa hann.

Lögreglan fékk útkall vegna heimiliserja og það útkall endaði á þennan skelfilega hátt.

Atkinson lést aðeins 90 mínútum eftir að hafa verið skotinn með rafbyssunni. Hann fékk læknisaðstoð á staðnum en það dugði ekki til að bjarga lífi hans. Hann lést skömmu eftir að hann kom inn á spítala.

Mál hans er nú í rannsókn og mun lögreglan ekki tjá sig meira um málið að sinni.

Atkinson var 48 ára að aldri. Hann var frábær framherji á sínum tíma og skoraði meðal annars í úrslitum deildabikarsins á Wembley árið 1994 er Villa lagði Man. Utd.

Hann endaði fótboltaferilinn í Suður-Kóreu árið 2001.