Flestir dísilbílar með margfalda uppgefna mengun

Svo virðist sem allir bílaframleiðendur séu jafn sekir og Volkswagen um rangar mengunartölur dísilbíla sinna. Víðtæk rannsókn á dísilbílum leiddi í ljós að svo til enginn þeirra mengaði eins og uppgefið er af framleiðanda, heldur margfalt meira.

Allir bílaframleiðendur hafa komið fyrir búnaði í dísilbílum sínum sem slökkva á mengunarvörnum þeim sem eru í bílum þeirra, en kalla þann búnað hinum ýmsu nöfnum og réttlæta tilvist þeirra með þeim rökum að hann tryggi lengri endingu vélanna.

Þessi staðreynd veltir upp þeirri spurningu af hverju Volkswagen, einn bílaframleiðenda, skuli refsað fyrir það sem þeir allir stunduðu, en sektir þær sem bíða Volkswagen aðeins í Bandaríkjunum nema gríðarháum upphæðum og ekki til dæmi um hærri sektir sem lagðar hafa verið á nokkurn bílaframleiðanda.

BMW 2 Series er ágætt dæmi um bíl sem ekki er framleiddur af Volkswagen, en mengar miklu meira en uppgefið er. Hann var, ásamt 52 öðrum dísilbílum, rannsakaður af þýskum yfirvöldum og reyndist menga 5 sinnum meira en uppgefið var af BMW.

Dacia Sandero reyndist menga 13 sinnum meira en uppgefið var. Við prófanir á Opel Zafira reyndist bíllinn hafa slökkt á mengunarvarnarbúnaði sínum 80% þess tíma serm bíllinn var í gangi. Í heildina reyndust þeir dísilbílar sem prófaðir voru menga 7 sinnum meira en uppgefin eyðsla þeirra.