Starfsmaður Mitsubishi varaði stjórnendur við eyðslutölusvindli fyrir 11 árum

Fyrir ellefu árum síðan varaði nýráðinn starfsmaður stjórnendur Mitsubishi við því að ljúga til um eyðslutölur bíla sinna. Nú, 11 árum síðar er japanski bílaframleiðandinn í djúpum skít vegna þess að þeir létu viðvaranir hans eins og vind um eyru þjóta.

Eftir að eyðslutölusvindl Mitsubishi uppgötvaðist í ár var sett á fót rannsóknarnefnd sem hafði það með höndum að finna út hvað varð til þess að þessar tölur voru ranglega fram settar og komst hún meðal annars að þessu.

Þessi nýi starfmaður rak augun í það að Mitsubishi notaðist við aðrar aðferðir en viðurkenndar voru af japöskum yfirvöldum við mælingu á eyðslu bíla. Margir af yfirmönnunum sem starfmaðurinn varaði við þessum röngu tölum eru ennþá að störfum þó sumir þeirra hafi verið látnir fjúka.

Rannsóknarnefndin komst að því að þeir sem enn eru í starfi þykjast ekkert muna eftir viðvörunum starfmannsins, en það keypti nefndin einfaldlega ekki og telur þá segja ósatt. Það var svo árið 2011 sem nefndin komst einnig að að nokkrir aðrir starfsmenn Mitsubishi vöruðu stjórnendur aftur við þessum tölum en ekki var heldur á þá hlustað og því fór sem fór.

Mitsubishi hefur nú viðurkennt að hafa gefið upp rangar eyðslutölur allt frá árinu 1991, eða í 25 ár. Það hlaut að taka einhverntíma enda.