Einkunnir eftir tapið gegn Frökkum: Gylfi bestur

Ísland er úr leik á Evrópumótinu í Frakklandi eftir 5-2 tap gegn Frakklandi á Stade de France í kvöld.

Leikurinn byrjaði ekki vel fyrir Íslands því eftir tuttugu mínútna leik var staðan orðin 2-0. Staðan var svo 4-0 í hálfleik.

Í síðari hálfleik klóruðu okkar menn aðeins í bakkann, en þeir Kolbeinn Sigþórsson og Birkir Bjarnason skoruðu mörk Íslands í síðari hálfleiknum.

Lokatölur, eins og áður segir 5-2, en Vísir valdi Gylfa Þór Sigurðsson mann leiksins með sjö í einkunn.

Einkunnir alla leikmanna auk umsagna má sjá hér að neðan.

Einkunnagjöf Íslands:



Byrjunarlið:

Hannes Þór Halldórsson, markvörður 4

Fengum ekkert aukalega frá Hannesi sem var vitað mál að við þyrftum. Fimmta markið skrifast að stóru leyti á hann.

Birkir Már Sævarsson, hægri bakvörður 5

Óþreytandi upp og niður völlinn en átti sem fyrr erfitt með að koma boltanum fyrir úr góðri stöðu.

Kári Árnason, miðvörður 4

Þeir Ragnar hikstuðu í samvinnunni í fyrsta markinu og Kári leit illa út í fjórða markinu þótt heppnin hafi verið með Frökkum. Skipt útaf í hálfleik.

Ragnar Sigurðsson, miðvörður 5

Samvinnan í hjarta varnarinnar gekk ekki vel í fyrri hálfleik sem hefur verið einn af lyklunum að velgengni liðsins.

Ari Freyr Skúlason, vinstri bakvörður 5

Öruggur í varnarleiknum en kom lítið út úr honum sóknarlega. Lagði upp seinna markið með fínni fyrirgjöf.

Jóhann Berg Guðmundsson, hægri kantmaður 6

Skapaði besta færi Íslands í fyrri hálfleik og var mikið í boltanum, skapandi og líflegur. Hélt því áfram þegar hann færði sig á vinstri kantinn í síðari hálfleik.

Aron Einar Gunnarsson, miðjumaður 6

Sýndi gríðarlegan dugnað á miðjunni og leiddi liðið í baráttunni.

Gylfi Þór Sigurðsson, miðjumaður 7

Besti maður Íslands í leiknum. Dró vagninn í sóknarleiknum og gaf okkur von um að geta skorað í leiknum. Flest færi Íslands komu eftir gullspyrnur Gylfa.

Birkir Bjarnason, vinstri kantmaður 5

Átti afar erfitt uppdráttar og komst seint í takt við leikinn. Nýttist lítið í sóknarleiknum og kom ekkert út úr þeim Ara vinstra megin í fyrri hálfleik. Virkaði andlaus lengi vel en skoraði gott mark í lokin.

Jón Daði Böðvarsson 5

Fékk besta færi Íslands í fyrri hálflleiknum en náði ekki að stýra boltanum í markið. Duglegur að vanda en vantaði styrk í baráttunni við nautsterka miðverði Frakkanna.

Kolbeinn Sigþórsson, framherji 6

Skoraði mark Íslands og vann einvígin sín í loftinu. Minnti franska fótboltaunnendur á styrkleika sína.

Varamenn:

Alfreð Finnbogason 6 - (Kom inn á fyrir Jón Daða Böðvarsson á 46. mínútu)

Átti fína innkomu, var mikið í boltanum og kom sér í færi.

Sverrir Ingi Ingason 5 - (Kom inn á fyrir Kára Árnason á 46. mínútu)

Leit illa út í fimmta marki Frakka og fór illa með algjört dauðafæri í síðari hálfleik. Minnti samt á hve björt framtíðin er með hann í vörninni, gríðarlega ógnandi í föstum leikatriðum.

Eiður Smári Guðjohnsen  - (Kom inn á fyrir Kolbein Sigþórsson  á 83. mínútu)

Goðsögnin lauk ferlinum með fyrirliðabandið og Ísland skoraði augnabliki eftir innkomuna. Takk.