Húseyjakvísl með frábæra opnun

Húseyjakvísl er á fáum árum orðin mjög eftirsótt á að veiða enda hefur hún braggast afskaplega vel síðustu ár.

Þegar veiðimenn við ánna voru skyldaðir til að sleppa fiski tók það nokkur ár að sýna sig að í viðkvæmum ám með til þess að gera lítilli stofnstærð af fiski virðist "Veitt og Sleppt" hafa mikil áhrif til hins betra.  Ekki bara aþð augljósa eins og fleiri fiskar í ánni að tímabili loknu til að hrygna heldur líka stærðin.  Já það er sannarlega stærðin sem dregur marga veiðimenn í Húseyjakvísl og það er ekki bara góða hlutfallið af stórlaxi heldur er sjóbirtingurinn þarna líka oftast í yfirstærðum.

"Ég var að gæda á silungasvæðinu þar sem við tylltum í tveimur löxum til viðbótar. Það voru tveir fullvaxnir að veiða á laxasvæðinu en deildu einni stöng á milli sín ásamt því að horfa á leikinn. Þeir náðu einum laxi og svo einum svakalegum birting og það er saga að segja frá honum. Þeir voru að veiða Réttarhyl þegar Óli, framkæmdastjóri Angling iQ setur í urriðatitt. Hann er að draga hann inn þegar eitthvað stórt tekur urriðann. Stuttu seinna landar Óli 85 cm sjóbirting sem er búinn að vera í ánni í smá tíma virðist vera." sagði leiðsögumaðurinn Stjáni Ben en á meðfylgjandi má sjá þennan flotta sjóbirting.

"Opnunarhollið var svakalegt í Kvíslinni og líklega algjört met. Það höfðu veiðst 4 laxar á silungasvæðinu áður en laxasvæðið opnaði og opnunarhollið lauk veiðum með 31 lax. Svo þegar ég kom í ána í dag var búið að landa 35 löxum." sagði Stjáni að lokum.