23 laxar farnir í gegnum teljarann í Blöndu

Blanda opnar á laugardaginn 5. júní og það er ekki laust við að mikil spenna sé að myndast fyrir þessum fyrsta veiðidegi í ánni á þessu tímabili.

Það hafa þegar sést laxar í ánni og hafa þeir verið duglegir að sýna sig í Damminum en einnig hafa nokkrir sést stökkva á Breiðunni.  Eftir að teljarinn fór niður hafa 23 laxar farið í gegn á efri svæðin og gefur það góð fyrirheit um að efri svæðin verði fljót í gang en þau opna ekki fyrr en 20. júní.  Svæði II hefur til að mynda verið mismikið stundað en þeir sem fá leiðbeiningar um svæðið eru yfirleitt fljótir að setja í lax.  Þarna er mikið af flottum breiðum og geysilega skemmtilegt að kasta flugu.  Þess má þó geta að þarna má líka veiða á maðk og spún. Eitthvað er laust í Blöndu viku eftir opnun á svæði I og eins má finna daga á Svæðum II-III og IV og ef grunur manna sem þekkja Blöndu vel reynist réttur stefnir í gott sumar í ánni.

Það sem gerir veiðina í Blöndu eftirsóknarverða, eins og víða í ánum á norðurlandi, er að meðalþyngdin er hærri en í ánum á suður og vesturlandi og þarna er stórlaxahlutfallið mjög gott.  Heildarveiðin í Blöndu í fyrra var 4829 laxar.