Fiat Chrysler græðir meira en Peugeot Citroën minna

Góð sala á bílum Jeep hjálpaði Fiat Crysler að ná mesta hagnaði af rekstri fyrsta ársfjórðungs í sögu fyrirtækisins. Hagnaðurinn nam 67 milljörðum króna. Sala bíla Jeep jókst um 15% á þessum fyrstu 3 mánuðum ársins og seldust alls 326.000 Jeep bílar. Heildarsala bíla Fiat Chrysler minnkaði þó um 3% milli ára og nam 1.086.000 bílum en hagnaður af sölu þeirra jókst um 7,2%.

Öndvert við marga aðra bílaframleiðendur þá var hagnaður af sölu bíla Fiat Chrysler í S-Ameríku, þrátt fyrir að salan þar hafi fallið um 24% á milli ára. Hagnaður á Kyrrafssvæði Asíu féll um heil 82% og 47% samdráttur varð þar í sölu. Fiat Chrysler hefur birt hagnaðarspá fyrir árið í heild sem kveður á um 266 milljarða króna hagnað.

Söluminnkun á mörgum heimssvæðum hjá PSA

Ekki var um eins gott uppgjör að ræða hjá franska bílaframleiðandanum PSA Peugeot Citroën en þar á bæ minnkaði hagnaður um 1,4% á fyrsta ársfjórðungi. Sala bíla PSA skilaði 1,5% minni tekjum en á fyrsta ársfjórðungi síðasta árs og tala seldra bíla lækkaði um 1,7%.

Það er aðallega vegna minnkandi sölu í Kína, Indlandi, á Kyrrahafssvæði Asíu og í löndunum fyrir botni Miðjarðarhafsins. Söluaukning um 16% í S-Ameríku og 5,9% í Evrópu vóg ekki upp söluminnkunina á hinum heimssvæðunum.