Nýr Call of Duty trailer eitt óvinsælasta myndband Youtube

Fyrsta stiklan fyrir nýjasta leiki Infinity Ward, Call of Duty: Infinite Warfe var birtur á mánudaginn. Þegar þetta er skrifað hefur verið horft rúmlega níu milljón sinnum á stikluna, en áhorfendur virðast alls ekki ánægðir með hana.

Hundruð þúsunda hafa lýst yfir óánægju sinni með því að setja „dislike“ við myndbandið. Alls 460 þúsund. Um er að ræða einu verstu útreið sem myndband á Youtube hefur fengið samkvæmt frétt Polygon.

Margir virðast setja sig upp á móti því að Call of Duty sé að færast langt í framtíðina og út í geiminn.

Framkvæmdastjóri Activision virðist þó ekki óánægður með móttökurnar. Í samtali við hluthafa sagði hann að enginn annar titill en COD gæti vakið upp svo miklar tilfinningar meðal leikjaspilara. Auk þess nefndi hann Black Ops 2 sem dæmi og sagði að á sínum tíma hefði fyrsta stikla hans safnað miklum fjölda „dislikea“, en sá leikur varð söluhæsti Call of Duty leikurinn á sínum tíma.