80.000 bíla töpuð framleiðsla hjá Toyota

Jarðskjálftinn stóri sem skall á Kyushu eyju í Japan þann 14. apríl hefur haft mikil áhrif á atvinnulíf og iðnaðarframleiðslu á eyjunni. Toyota er eitt þeirra fyrirtækja sem ekki hafa farið varhluta af því og íhlutir í bíla þeirra sem framleiddir eru á eyjunni hafa ekki borist.

Toyota áætlaði skömmu eftir skjálftann að áhrif þess væri 56.000 bíla töpuð framleiðsla en nýjar tölur frá Toyota kveða á um a.m.k. 80.000 bíla. Toyota taldi í fyrstu að tapaðri framleiðslu yrði náð upp á nokkrum mánuðum en þar á bæ hefur ekki verið gefið upp hvenær henni verður náð ef það á annað borð tekst.

Það myndi krefjast aukavakta í verksmiðjum þeirra og nýjum helgarvöktum og á helgidögum og er Toyota nú í viðræðum við stéttarfélög um slíkt. Toyota hefur neyðst til að leggja niður framleiðslu í nokkrum verksmiðjum sínum vegna skorts á íhutum og sumar þeirra hefja aftur framleiðslu í dag en í öðrum seinna í þessari viku.

Í enn öðrum er ekki ljóst hvenær framleiðsla getur hafist aftur, meðal annars í verksmiðjum Lexus í Miyata og Motomachi nálægt upptökum skjálftans og á meðan hleðst upp töpuð framleiðsla.

Um 42% af framleiðslu Toyota og Lexus í Japan er flutt til annarra landa og því mun verða skortur á Toyota og Lexus bílum víða um heim. Meðal þeirra bíla sem yfirvofandi skortur verður á er Lexus RX og NX jepparnir, sem og á Lexus GS, ES og CT hybrid fólksbílunum.