Aukaþættir Top Gear – ExtraGear

Það mun ekki skorta bílaþætti á næstunni, en styttast fer í sýningar á nýjum Top Gear þáttum með nýjum stjórnendum, auk þáttann sem þeir Jeremy Clarkson, Richard Hammond og James May eru að vinna að fyrir Amason Prime.

Nú hefur BBC gefið upp að til standi að sýna aukaþætti Top Gear sem bera munu nafnið ExtraGear en þar verður skyggnst bak við tjöldin við gerð aðalþáttanna. Fyrir þeim þáttum fer Rory Reid og verða þættirnir sýndir á BBC Three strax á eftir sýningum nýrra Top Gear þátta.

Þættirnir verða 30 mínútna langir. Þeir verða einnig sýndir í BBC America og á BBC Brit. Með þessum þáttum er meiningin að sýna áhugamönnum um bíla og fjölmörgum aðdáendum Top Gear hvernig þeir þættir eru framleiddir og hvað það er sem fer fram bak við tjöldin. Þar munu áhorfendur sjá nýtt sjónarhorn á mörgum af athygliverðustu bílum heims.

Ný þáttaröð Top Gear fer í sýningu 22. maí en þættir gamla Top Gear þríeykisins munu hefjast í haust og ekki er komin nákvæmari dagsetning en það.