Flott opnun í Varmá

Varmá er ein af vinsælli vorveiðiám landsins og það er sífellt stækkandi hópur manna sem tekur ásfóstri við hana.

Það var vaskur hópur manna sem opnaði Varmá í gær og þrátt fyrir oft rysjóttar aðstæður verður ekki annað sagt en að veiðin hafi verið góð.  Eins og venjulega eru straumflugur mest notaðar svona í upphafi tímabils þegar fiskurinn er nokkuð sotlinn og tökuglaður og var engin breyting þar á í gær.  Hvítar flugur eru oft mjög góðar í vorveiðinni og gaf Hvítur Dýrbítur nokkuð af fiski í gær.

Halldór Gunnarsson var við Varmá og landaði hópurinn sem hann fór fyrir 30-40 fiskum og það var víst töluvert sem slapp líka.  Eins og er orðið þekkt í Varmá voru bleikjurnar risavaxnar en þær voru allar um 8-10 pund og eins og sést á myndinni sem fylgir fréttinni er þetta engin smá bleikja.  Ekki veiddust stórir birtingar þrátt fyrir að einhverjir hafi sést en birtingurinn var yfirleitt um 45-55 sm að lengd.  Fiskurinn var mjög vel dreifður um ánna og voru fiskar teknir frá golfvelli og niður að bakka að sögn Halldórs.