Audi Q2 kemur í sumar

Audi sýnir nú þennan Q2 jeppling á bílasýningunni í Genf og hefur látið uppi að ekki sé langt í markaðssetningu hans, eða á þriðja ársfjórðungi. Audi hefur verið þekkt fyrir fjórhjóladrifsbíla sína en þessi bíll verður bæði í boði með eingöngu framhjóladrifi og fjórhjóladrifi.

Hann er svo lítill að Audi þorir að hafa minnstu vélina í honum 1,0 lítra og þriggja strokka, en hún er þó 114 hestöfl. Q2 vegur heldur ekki nema 1.200 kíló í sinni léttustu útfærslu. Audi ætlar reyndar að bjóða sex vélargerðir í bílinn og öflugasta bensínvélin er 190 hestöfl, fjögurra strokka með forþjöppu.

Jepplinginn má einnig fá með dísilvélum, allt að 190 hestöfl og 1,4 lítra bensínvél sem er 148 hestöfl. Undirvagn bílsins er sömu MQB gerðar og finna má í Audi A3 og Volkswagen Golf og fleiri bílum Volkswagen bílafjölskyldunnar. Audi er ekki að splæsa miklu áli í þennan bíl, aðallega stál og því bendir það til þess að hann verði fremur ódýr.

Samt eru flottir hlutir í bílnum eins og rafræn lokun á skotti og 12,3 tommu stafrænn skjár í fyrir hraðamæli og snúningsmæli og þar má einnig kalla upp leiðsögukerfi bílsins og afþreyingarkerfið. Annar skjár sprettur uppúr mælaborðinu með svo til sömu upplýsingum og á þriðja skjánum má eingöngu eiga við afþreyingarkerfið.

Bíllinn verður með Wifi og Audi Connect kerfið fyrir síma og niðurhal og fá má 750 watta og 14 hátalara Bang & Olufsen hljóðkerfi sem aukabúnað. Audi Q2 getur bremsað sjálfur við aðsteðjandi hættu fyrir framan bílinn og skynvæddur skriðstillir heldur réttri vegalengd að næsta bíl í mikilli umferð. Það er því margt af því flottasta úr stærri bílgerðum Audi sem fá má í þennan litla jeppling.