Audi S4 Avant í Genf

Audi kynnir nú langbaksútgáfuna af S4 bíl sínum á bílasýningunni í Genf en hann er kraftaútgáfa af nýjum A4 bíl. Audi S4 er sannerlega úlfur í sauðagæru því þessi bíll sem lítur út fyrir að vera venjulegur fjölskyldulangbakur tekur sprettinn í hundraðið á litlum 4,9 sekúndum og sedan-gerð hans er enn sneggri, eða 4,7 sekúndur.

Vélin í bílnum er forþjöppudrifin V6 TFSI bensínvél, 354 hestöfl, tengd við 8 gíra sjálfskiptingu og þekkt gæða fjórhjóladrif Audi. Þessi bíll hefur mikið farangursrými, eða 505 til 1.510 lítra með aftursætin niðri og er því bæði praktískur bíll og sportbíll í leiðinni. Ekki slæm blanda það.

Þrátt fyrir allt sitt afl eyðir þessi bíll aðeins 7,4 lítrum af bensíni á hverja 100 kílómetra og mengar 175 g af CO2 og sedan bíllinn 170 g. Audi hefur létt bílinn á milli kynslóða og stuðlar það að verulega minnkaðri eyðslu. Bíllinn kemur á 18 tommu felgum með val um 19 tommu og enn sportlegri felgur.

Audi S4 er 23 mm lægri á vegi en hefðbundin gerð Audi A4 og með mun sportlegri aksturseiginleika. Verðið á Audi S4 Avant verður 61.150 evrur, eða tæpar 8,7 milljónir króna og sedan útfærsla hans kostar 8,4 milljónir króna á meginlandi Evrópu.