Rimac rafmagnsbílinn er 2,6 sekúndur í 100

Króatíski rafmagnsbílaframleiðandinn Rimac kynnti bílinn Concept_One á bílasýningunni í Frankfürt fyrir 5 árum og er nú aftur að sýna þennan bíl á bílasýningunni í Genf í þessum mánuði og þá tilbúinn til afhendingar fyrir fyrsta kaupanda bílsins.

Þessi bíll er enginn hefbundinn rafmagnsbíll því hann er ári snöggur og tekur sprettinn í 100 km hraða á 2,6 sekúndum. Hann kemst í 200 á 6,2 sekúndum og í 300 á 14,2 sekúndum. Þessar fáránlegu hröðunartölur segja þó ekki allt um þennan magnaða handsmíðaða bíl.

Á þeim 5 árum sem liðin eru frá fyrstu kynningu hans hafa miklar breytingar verið gerðar. Hann er nú fjórhjóladrifinn og með “torque-vectoring” kerfi sem eykur verulega aksturshæfni hans. Við hvert hjól hans er mótor til stýringar bílsins sem er afar nákvæm og fara þar á milli hundruðir skipana á hverri sekúndu til að tryggja sem nákvæmasta stýringu bílsins.

Þessi ofurbíll er ógnardýr en Rimac hefur ekki gefið upp nákvæman verðmiða á honum að sinni.