Nicklas Bendtner sektaður vegna myndar við hlið Benz bíls

Fótboltamaðurinn og Daninn Nicklas Bendtner hefur ávallt verið talinn skrautlegur karakter en hann spilar nú með Wolfsburg í Þýskalandi en var áður á mála hjá Arsenal. Hann er þekktur fyrir ýmis skrítin ummæli og athafnir og nú hefur hann enn einu sinni komið sé í klandur.

Hann birti mynd af sér á Instagram fyrir stuttu þar sem hann stendur við hlið Mercedes Benz bíls sem á öllu virðist að hann hafi keypt sér. Það væri svo sem í fínu lagi ef Wolfsburg liðið væri ekki í eigu Volkswagen og allir leikmenn Wolfsburg eru bundnir samningum sem meðal annars kveða á um að þeir séu ekki að birta myndir af sér við bíla annarra bílaframleiðenda.

Volkswagen mun sekta Bendtner fyrir þennan gjörning og lái hver þeim það sem vill. Bendtner varð sjálfum sér að athlægi fyrir nokkrum árum er hann veifaði sínu heilagasta útí umferðina til að krækja sér í leigubíl. Hann var einnig sektaður af UEFA fyrir að vera í vitlausum lit af undirbuxum í leik og hann var einnig handtekinn eitt sinn er hann reyndi að brjóta upp hurð á eigin húsi þar sem honum langaði svo í sund.

Hann varð líka örlítið umdeildur þegar hann fullyrti að hann ætlaði að verða besti fótboltamaður heims, en frægðarsól hans hefur lækkað nokkuð frá Arsenal dögum sínum þó hann enn skori mörk fyrir Wolfsburg og stöku sinnum fyrir danska landsliðið. Bendtner mætti lesa smáa letrið í samningum sínum betur í framtíðinni.