EyeSight tækniundur ársins í Tékklandi

Subaru eru vinsælir bílar í Tékklandi og eru farnir að ögra innlenda bílaframleiðandanum Skoda þar í landi. Fyrr í mánuðinum valdi blönduð dómnefnd bílablaðamanna og áhugafólks forvarnarkerfið EyeSight í Subaru Outback sem tækniundur ársins á tékkneska bílamarkaðnum auk þess sem Subaru Levorg blandaði sér í efstu sætin um val á bíl ársins 2016 þar í landi og hlaut á endanum brosið.

Öryggiskerfið Eyesight tengir saman tvær myndavélar sem staðsettar eru innan við framrúðuna og senda litmyndir í þrívídd til tölvu sem kennt hefur verið að bera kennsl á lögun hluta og greina hraða og fjarlægðir með næstum sömu nákvæmni og mannsaugað býr yfir. 

EyeSight gerir einnig greinarmun á gangandi vegfarendum, reiðhjólum, mótorhjólum og bílum auk þess að skynja hemlaljós svo eitthvað sé nefnt.  EyeSight er eitt fullkomnasta öryggiskerfi sem völ er á í dag og aðstoðar ökumenn við að koma í veg fyrir árekstra. Subaru bílar með EyeSight koma 80% sjaldnar við sögu við aftanákeyrslur og 50% sjaldnar við sögu þar sem ekið var á gangandi vegfarendur. 

.