Subaru með EyeSight lendir mun sjaldnar í umferðaróhappi

Ný rannsókn á umferðarslysum í Japan þar sem Subarubílar komu við sögu á árabilinu frá og með 2010 til og með 2014 sýnir að Subaru með nýja forvarnarbúnaðinn EyeSight komu 80% sjaldnar við sögu við aftanákeyrslur og 50% sjaldnar við sögu þar sem ekið var á gangandi vegfarendur.

Rannsóknin tók til 10 þúsund Subarbíla í Japan. Í heild komu 60% færri bílar með EyeSight við sögu í umferðarslysum heldur en Subarubílar sem ekki voru með búnaðinn.

Öryggiskerfið Eyesight tengir saman tvær myndavélar sem staðsettar eru innan við framrúðuna og senda litmyndir í þrívídd til tölvu sem kennt hefur verið að bera kennsl á lögun hluta og greina hraða og fjarlægðir með næstum sömu nákvæmni og mannsaugað býr yfir.

EyeSight gerir einnig greinarmun á gangandi vegfarendum, reiðhjólum, mótorhjólum og bílum auk þess að skynja hemlaljós svo eitthvað sé nefnt.  EyeSight er eitt fullkomnasta öryggiskerfi sem völ er á í dag og aðstoðar ökumenn við að koma í veg fyrir árekstra.

Subaru hefur unnið að þróun kerfisins síðastliðin 20 ár og hafði verið í prófunum í almennri umferð í Japan í fimm ár áður en það var sett á alþjóðamarkað síðastliðið vor.