Mazda eyðslugrennstir vestanhafs

Í Bandaríkjunum heldur Environment Protection Agency utan um tölur um eyðslu allra bíla sem þar eru seldir. EPA greinir á ári hverju frá því hvaða bílaframleiðandi stendur sig best, þ.e. hver þeirra bíður bíla sem að meðaltali eyða minnstu eldsneyti.

Í niðurstöðum stofnunarinnar í ár kemur fram að Mazda er sá bílaframleiðandi sem  býður eyðslugrennstu bílana og eyða þeir að meðaltali 8,0 lítrum á hverju hundrað kílómetra. Mazda bætti sig um 0,4 lítra á milli ára, allra bílaframleiðenda mest að frátöldum BMW bílum sem eyddu 0,5 lítrum minna en í fyrra.

Í öðru sæti á lista EPA kom svo Subaru. Þar á eftir kom svo Hyundai, Honda, Nissan, BMW, Kia, Toyota, Mercedes Benz og í tíunda sætinu kemur svo skásti bandaríski bílaframleiðandinn, Ford. Á þessum lista sést að asískir bílaframleiðendur dóminera hann og tveir þýskir lúxusbílaframleiðendur komast samt á hann, en bandarískir bílaframleiðendur framleiða ennþá svo eyðslufreka bíla að aðeins einn þeirra nær á listann. General Motors og Chrysler reka lestina á listanum á eftir Ford og því eru allir innlendir framleiðendur neðst á honum.

Eitt verður að hafa í huga við þennan lista að öll bílafyrirtæki Volkswagen bílasamstæðunnar voru útilokaðar að þessu sinni þar sem bílar þeirra eru undir rannsóknum hvað varðar eyðslu og mengun og því ekki hægt að staðsetja þau á listanum að þessu sinni. Gera má ráð fyrir að mörg þeirra hefðu þó náð hátt á listanum.

Það vekur einnig athygli hvað eyðslutölur eru í raun háar fyrir alla bílaframleiðendur, en í Bandaríkjunum eru almennt stærri og öflugari vélar í boði en í Evrópu og Asíu og því eyða þeir talsvert meira en sömu bílar annarsstaðar.