Herbie bjallan seldist á 11,4 milljónir

Ellefu milljónir króna gæti virst nokkuð há upphæð fyrir 1963 árgerðina af Volkswagen bjöllu, en þessi er þó ekki bara einhver bjalla, heldur hin raunverulega bjalla sem notuð var við kvikmyndun Herbie Rides Again og Herbie Goes to Monte Carlo myndanna frá Disney. Þessar myndir voru önnur og þriðja myndin í Herbie kvikmyndaröðinni.

Bjallan sú arna hefur þá sérstöðu að henni má aka úr aftursætinu, en hún var sérútbúin þannig fyrir myndirnar svo að áhættuökumaður gæti ekið bílnum án þess að það sæist að ökumaður væri í bílnum og svo sýndist að hann færi að eigin vilja.

Bíllinn var týndur í marga áratugi en fannst í vöruhúsi í Flórída fyrir örfáum árum. Bíllinn var boðinn upp í þessari viku hjá Bonhams og fyrir hann fengust 86.250 dollarar, eða 11,4 milljónir króna. Það gerir þessa bjöllu að þeirri dýrustu sem nokkur hefur keypt, en borgaðar voru 10,9 milljónir fyrir 1955 árgerðina af bjöllu með blæju á Amelia Island uppboðinu í fyrra.

Herbie bjallan skipti reyndar um eigendur fyrir 55.200 dollara fyrir minna en ári síðan, en nú hefur sá kaupandi semsagt grætt 4,1 milljón króna. Á Bonham uppboðinu seldist ökuklæðnaður Steve McQueen úr myndinni Le Mans fyrir 425.000 dollara, eða 56 milljónir króna. Það var þó lítið fé í samanburði við kjól Judie Garland, sem hún klæddist í myndinni The Wizard of Oz, en hann seldist á 206 milljónir króna.