Fisker Karma fær BMW vélar og rafmagnsdrifrásir

Nýr eigandi hins gjaldþrota Fisker Karma, sem nú ber nafnið Karma Automotive, hefur greint frá samningi við BMW um útvegun véla og rafmagnsdrifrása í nýja bíla Karma.

Það sem mest kemur á óvart varðandi þetta samstarf er að BMW mun útvega rafhlöður, rafmótora og brunavélar í Karma bíla. Margir hefðu haldið að samstarfið væri tvíhliða og að Karma myndi aðstoða BMW við útvegun rafhlaða og rafmótora á móti brunavélum frá BMW, rétt eins og Tesla hefur útvegað Toyota og Daimler rafmagnsdrifrásir.

Það sýnir ef til vill best hvað BMW er komið langt í þróun rafbíla sjálft, en Fisker Karma bílar voru með rafmagnsdrifrás áður en að gjaldþroti þess kom. BMW hefur náð mikilli sölu á i3 og i8 rafmagnsbílum sínum, sem og í tvinnaflbílum BMW 3, 5 og 7 bíla sinna.

Eigendur Karma Automotive eru kínverskir, en það var Wanxiang bílaframleiðandinn sem keypti hið gjaldþrota Fisker Karma. Ekki kemur fram hvenær vænta megi nýrra bíla frá Karma Automotive.