WOW air flýgur til Los Angeles og San Fransisco

WOW air mun hefja áætlunarflug til Los Angeles og San Fransisco næsta sumar og verða þetta fimmti og sjötti áfangastaður flugfélagsins í Norður-Ameríku. WOW air er fyrsta íslenska flugfélagið til að bjóða upp á beint flug til Los Angeles. Flogið verður fjórum sinnum í viku til Los Angeles og fimm sinnum í viku til San Francisco og verður flugið allan ársins hring. Þetta kemur fram í tilkynningu frá flugfélaginu.

Þrjár nýjar Airbus A330-300 breiðþotur verða notaðar í flug WOW air til vesturstrandar Bandaríkjanna og verða þetta stærstu þotur sem flogið hefur verið í áætlunarflugi til og frá Íslandi.

„Airbus A330-300 vélar eru sparneytnar, umhverfisvænar og langdrægar breiðþotur sem hafa drægni upp á 11.750 km. Vélarnar geta tekið að hámarki 440 farþega en vélar WOW air verða með 340 sætum til þess að hægt sé að bjóða upp á aukið sætabil og þægindi. Lengd þeirra er 64 metrar og vænghafið er 60 metrar,“ segir í tilkynningunni. Þar kemur fram að listaverð á nýrri Airbus A330-300 sé um 32 milljarðar íslenskra króna. 1200 slíkar vélar hafa verið framleiddar í heiminum.

„Norður-Ameríku flug okkar sem og tengiflug okkar yfir Atlantshafið hefur gengið frábærlega og hefur sætanýting allt frá upphafi verið yfir 90%. Það liggur því beinast við að bæta við Los Angeles og San Fransisco sem eru stórkostlegar borgir í Kaliforníu og styrkja enn frekar leiðarkerfi okkar,“ segir Skúli Mogensen forstjóri og stofnandi WOW air.  

Ljóst sé að mikil þörf og eftirspurn sé eftir góðu lággjaldaflugfélagi sem fljúgi yfir Atlantshafið. 

„Við höfum nú þegar lækkað verð um tugi prósenta og munum að sjálfsögðu halda því áfram. Við hlökkum til að bjóða upp á þessa tvo áfangastaði á vesturströnd Bandaríkjanna á frábærum verðum. Með þessari aukningu mun WOW air meira en tvöfalda sætaframboð sitt á næsta ári frá 900 þúsund sætum í ár í tæplega 2 milljónir sæta á næsta ári“ segir 

Sala á fargjöldum til Los Angeles og San Fransisco mun hefjast í byrjun næsta árs.