Langdrægari Volt á lægra verði

Önnur kynslóð Chevrolet Volt rafmagnsbílsins er komin í sölu í Bandaríkjunum og kostar minna en bíllinn sem hann leysir af hólmi. Verð nýja Volt er 33.995 dollarar, eða 4,25 milljónir króna, en eldri gerðin var á 34.170 dollara.

Það sem meira er Chevrolet býður nú strax 1.000 dollara afslátt til 2. nóvember á þeim nýja og til að losna við eldri gerðina býðst 2.500 dollara afsláttur. Þetta er þó ekki endanlegt verð bílsins þar sem í flestum ríkjum Bandaríkjanna þar sem bíllinn er seldur fylgir 7.500 dollara niðurgreiðsla. Þá er endanlegt verð nýja Volt komin í 25.495 dollara, eða innan við 3,2 milljónir króna.

Nýr Volt kemst nú 85 kílómetra á hverri hleðslu og eftir það tekur við einskonar ljósavél sem breytir afli brunahreyfils í rafmagn svo halda megi lengri leiðir. Nýi bíllinn kemst 25 km lengra en eldri gerðin.

Í september nýliðnum seldi Chevrolet aðeins 9.264 Volt bíla og minnkaði salan um 36% milli ára, en með nýrri gerð bílsins er það von Chevrolet að salan taki mikinn kipp. Ekki ætti verðið að hrinda kaupendum frá, en Bandaríkjamenn hafa ekki verið ginkeyptir fyrir umhverfisvænum bílum undanfarið vegna þess lága eldsneytisverðs sem í landinu er.