Lítið að gerast í Stóru Laxá

Ekkert hefur bólað á stóru haustgöngunum sem mæta venjulega í byrjun september í Stóru Laxá með tilheyrandi aflahrotu.

Það eru margir veiðimenn sem gera hreinlega út á að mæta í ánna á þessum tíma þegar mokveiðist af stórum og flottum haustlaxi. Veiðin hefur oft verið ævintýraleg og dæmi um veiðimenn sem fékk 28 laxa á einum degi í september árið 2013 og þar af voru níu laxar milli 95 og 100 sm langir. Svona sögur hafa ekki komið úr Stóru Laxá í haust og virðast haustgöngurnar annað hvort hafa brugðist eða þær hreinlega ekki komnar ennþá en það þarf góðann slurk af úrhellisrigningu til að hækka vatnið í ánni sem er orðið heldur lágt.

Heildarveiðin í sumar er 362 samkvæmt tölum á heimasíðu Landssambands Veiðifélaga sem er aðeins yfir meðalveiði árana 1974-2008 en á þessum árum er meðalveiðin 313 laxar sem er ekkert há tala á 10 stangir. Besta veiðin var árið 2013 þegar 1776 löxum var landað. Meira að segja á slöku ári eins og í fyrra veiddist vel í henni en þá komu 882 laxar á land.