Laxá í Dölum komin yfir 1300 laxa

Laxá í Dölum kom feykilega sterk inn seinni part sumars og veiðin siðustu daga hefur verið mjög góð.

Síðasta vika í Laxá í Dölum skilaði 204 löxum á stangirnar sex. Þetta er ein mesta veiði á stöng á landsvísu um þessar mundir og er Laxá því í fantaformi líkt og undanfarnar vikur. Vesturlandið hefur heilt yfir verið afar gott síðustu daga og hefur Laxá í Dölum verið ein af bestu ánum á því svæði. Hún fór seint af stað eins og vesturlandið heilt yfir en heildarveiðin var sem dæmi ekki nema 265 laxar í byrjun ágúst en síðan hefur veiðin verið alveg ævintýraleg.

Veitt er til 28 september í ánni svo þessi tala á enn eftir að hækka en á heimasíðu leigutakans er líka tekið fram að það sé laust í eitt hollið í ánni núna í september vegna forfalla en aðsóknin í Laxá í Dölum hefur verið slík að líklega eru þessar stangir þegar farnar þegar þessi orð eru skrifuð.