GM veðjar á Indland

Bílamarkaðurinn í Indlandi hefur verið í nokkurri lægð á undaförnum árum og þar seljast tæplega 3 milljónir bíla á ári. Ýmis teikn eru þó á lofti um aukna sölu á næstu árum og því er spáð að árið 2020 verði Indland orðinn þriðji stærsti bílamarkaður heims á eftir Kína og Bandaríkjunum.

General Motors ætlar greinilega ekki að missa af þessum vagni og ætlar á næstu árum að fjárfesta fyrir 1 milljarð dollara, eða um 134 milljarða króna í starfsemi sína í Indlandi. 

Enn smár bílasali í Indlandi

GM seldi aðeins 56.700 bíla í fyrra í Indlandi og var markaðshlutdeild þeirra aðeins 1,8%. Þessu ætlar Mary Barra, forstjóri GM að breyta og vaxa afar hratt í Indlandi. Stefnan er að kynna 10 nýja bíla í Indlandi á næstu 5 árum og verða þeir framleiddir þar. Í dag eru japanskir og kóreskir bílaframleiðendur ráðandi á bílamarkaðnum í Indlandi.

Framleiðendur eins og Suzuki og Hyundai hafa náð miklum árangri í Indlandi en bandarísk og evrópsk bílafyrirtæki hafa ekki náð að festa nægilega rótum í Indlandi og bjóða ekki nógu litla og ódýra bíla þar. 

Verður smíðamiðstöð fyrir ódýra bíla GM

GM ætlar einmitt að framleiða ódýra og smáa bíla í Indlandi og ekki bara selja þá þar heldur einnig í öðrum löndum í Asíu. Þar munu nýjar verksmiðjur GM í Indlandi leika aðalhlutverk. Í leiðinni ætlar GM að draga úr framleiðslu sinni í S-Kóreu, en þar eru framleiddir fimmtungur af bílum GM á hverju ári.

Hækkandi launakostnaður í S-Kóreu hefur hinsvegar valdið GM áhyggjum og stefnan er að flytja talsvert af framleiðslunni þaðan í nýjar verksmiðjur í Indlandi. Framleiðslan í S-Kóreru mun í leiðinni breytast í framleiðslu dýrari bíla GM.