18 laxa dagur í Langá í gær

Eftir að hafa verið vatnsmikil frá opnun er Langá á Mýrum loksins að sjatna og með minnkandi vatni koma stækkandi göngur.

Áin var eins og flestar ár á vesturlandi gífurlega vatnsmikil og þrátt fyrir að staðan í teljaranum fyrir tæpri viku hafi staðið í 162 löxum fundust þessir laxar illa í miklu vatni. Um leið og hún fór að detta niður í vatni fóru fleiri laxar að grípa flugurnar hjá veiðimönnum og eftir að hollið sem kláraði veiðar að hádegi í gær sjatnaði áin bara hraðar. Hollið sem tók við gerði góða veiði á fyrstu vakt og samtals komu 18 laxar á land en fleiri sluppu.

Það er svolítið merkilegt að þrátt fyrir mikið vatn, og að áin sé tær í miklu vatni þökk sé vatnsmiðlun við Langavatn, að flestar tökurnar eru að koma á litlar flugur alveg niður í #16. Það verður fróðlegt að sjá framhaldið í Langá og ánum í kring núna eftir stóra strauminn í gær og hvað gerist fram að næsta straum.