Sigurganga Norrköping heldur áfram

Arnór Ingvi Traustason spilaði allan leikinn fyrir Norrköping sem heldur áfram sigurgöngu sinni í sænsku úrvalsdeildinni í knattspyrnu. Þeir unnu Malmö í dag, 3-1.

Simon Kroon kom Malmö yfir, en Kári Árnason gengur í raðir Malmö á næstu vikum. Linus Wahlqvist jafnaði metin fyrir Norrköping og Emir Kujovic kom þeim yfir úr vítaspyrnu rétt fyrir hlé.

Malmö gerðu allt hvað þeir gátu til þess að jafna metin, en Alexander Fransson skoraði þriðja mark Norrköping tveimur mínútum fyrir leikslok. Lokatölur 3-1 sigur Norrköping.

Norrköping hefur ekki tapað síðan 20. apríl, en þeir hafa síðan þá spilað tíu leiki. Þeir hafa gert tvö jafntefli og unnið átta, en liðið situr í öðru sæti deildarinnar, tveimur stigum á eftir Gautaborg sem er á toppnum.