Frumsýnt á Vísi: Nýtt myndband Samaris var tekið upp í einu skoti

Nýtt myndband hljómsveitarinnar Samaris við lagið Hafið er frumsýnt á Vísi og má sjá í spilaranum hér að ofan. Marteinn Þórsson, leikstjóri kvikmyndanna XL og Roklands, leikstýrir myndbandinu sem er allt tekið upp í einu samfelldu „skoti.“

„Það þurfti sjö tökur til að ná inn réttri hreyfingu og tempói,“ segir Marteinn. Myndbandið er tekið upp við Selvogsvita á Suðurlandi, í nokkuð köldu veðri að sögn Marteins.

Hljómsveitin Samaris vann Músiktilraunir árið 2011 og gaf út sína fyrstu plötu tveimur árum síðar. Sveitina skipa Áslaug Rún Magnúsdóttir, Þórður Kári Steinþórsson og Jófríður Ákadóttir.

Marteinn sá um framleiðslu, leikstjórn og alla eftirvinnslu en Ryan Parteka um myndatöku. Þórunn Magnea Magnúsdóttir, Salóme R. Gunnarsdóttir og Hilmir Jensson leika í myndbandinu, Hildur Sigrún Valsdóttir sá um búninga og Svava G. Margrétardóttir um förðun.