Viking áfram í bikarnum eftir vítaspyrnukeppni gegn 2. deildar liði

Norska úrvalsdeildarliðið Viking Stavanger komst áfram í átta liða úrslit bikarkeppninnar í fótbolta þar í landi í kvöld þegar það marði sigur gegn 2. deildar liði Kristiansund eftir vítaspyrnukeppni.

Jón Daði Böðvarsson lagði upp fyrra mark Viking í leiknum fyrir nígeríska framherjann Suleiman Abdullahi á 61. mínútu, en Kristianstund jafnaði metin með marki Sverre Ökland átta mínútum síðar, 1-1.

Jón Daði, sem Aftonbladet sagði vera á förum frá Viking í dag, var í byrjunarliðinu líkt og fyrirliðinn Indriði Sigurðsson og Steinþór Freyr Þorsteinsson.

Leikurinn fór í framlengingu og þar héldu Víkingarnir væntanlega að þetta væri komið þegar annar 19 ára gamall nígerískur framherji, Samuel Adegbenro, kom gestunum aftur yfir, 2-1, á 108. mínútu.

En 2. deildar liðið gafst ekki upp og jafnaði metin, 2-2, á lokamínútu fyrri hálfleiks framlengingarinnar. Það gerði Espen Næss Lund.

Ekkert var skorað í seinni hálfleik framlengingarinnar og þurfti því að grípa til vítaspyrnukeppni.

Þar fóru leikmenn 2. deildar liðs Kristianstund á taugum og brenndu af öllum þremur spyrnum sínum. Magne Hoseth, Veton Berisha og Indriði Sigurðsson skoruðu úr spyrnum Viking og sendu liðið áfram.