Rosengård í góðri stöðu fyrir seinni leikinn

Sara Björk Gunnarsdóttir og stöllur hennar í Rosengård gerðu 1-1 jafntefli við Wolfsburg á útivelli í fyrri leik liðanna í átta-liða úrslitum Meistaradeildar Evrópu í dag. Sara lék allan leikinn fyrir Rosengård en hún er fyrirliði liðsins.

Hin brasilíska Marta kom sænsku meisturunum yfir á 56. mínútu eftir sendingu frá Önju Mittag. Rosengård hélst þó ekki lengi á forystunni en tíu mínútum síðar jafnaði Verena Faisst metin fyrir Wolfsburg og þar við sat.

Wolfsburg hefur unnið Meistaradeildina tvö síðustu ár og getur orðið fyrst liða til að vinna keppnina þrjú ár í röð.

Rosengård og Wolfsburg mætast öðru sinni á Malmö Idrottsplats á laugardaginn en þá kemur í ljóst hvort liðið fer áfram í undanúrslit.