Jafnt í Íslendingaslag í dönsku deildinni

FC Kaupmannahöfn og Randers skildu jöfn, 1-1, í Íslendingaslag í dönsku úrvalsdeildinni í fótbolta í kvöld.

Rúrik Gíslason var í byrjunarliði FCK en var tekinn af velli á 71. mínútu. Þá var staðan 1-0 fyrir FCK en sex mínútum síðar jafnaði Djiby Fall metin fyrir Randers og þar við sat.

Björn Bergmann Sigurðarson kom inn á hjá FCK á 82. mínútu. Liðið er í 2. sæti deildarinnar, 11 stigum á eftir toppliði Midtjylland.

Ögmundur Kristinsson sat allan tímann á varamannabekk Randers en Theodór Elmar Bjarnason lék ekki með vegna meiðsla.

Randers er í 3. sæti, sjö stigum á eftir FCK.