Sér Mourinho eftir að hafa látið Salah fara?

Egyptinn Mohamed Salah hefur heldur betur öðlast nýtt líf síðan hann var lánaður frá Chelsea til ítalska liðsins Fiorentina.

Flórensliðið fékk Salah að láni á lokadegi félagaskiptagluggans en lánssamningurinn var hluti af félagaskiptum Juans Cuadrado til Chelsea en Lundúnaliðið greiddi auk þess um 23 milljónir fyrir Kólumbíumanninn.

Salah kom til Chelsea frá svissneska meistaraliðinu Basel í janúar 2014 en náði aldrei að festa sig í sessi hjá Lundúnaliðinu.

Egyptinn lék aðeins 18 leiki í bláu treyjunni og skoraði tvö mörk, annað þeirra í 6-0 sigrinum á Arsenal 22. mars 2014.

Salah hefur hins vegar blómstrað hjá Fiorentina. Hann skoraði ekki í fyrsta leik sínum fyrir félagið en hefur síðan skorað sex mörk í jafn mörgum leikjum.

Þrjú þessara marka hafa komið í Serie A. Salah skoraði sitt fyrsta mark fyrir Fiorentina í 1-3 sigri á Sassuolo og skoraði síðan mark Flórensliðsins í 1-1 jafntefli við Torino. Egyptinn skoraði svo sigurmarkið gegn Inter um helgina.

Salah hefur skorað eitt mark í Evrópudeildinni - í 2-0 sigrinum á Tottenham í seinni leiknum í 32-liða úrslitunum - og skoraði svo bæði mörk Fiorentina í 1-2 sigri á Juventus á útivelli í fyrri leik liðanna í undanúrslitum ítölsku bikarkeppninnar.

Cuadrado bíður hins vegar enn eftir sínu fyrsta marki fyrir Chelsea en hann hefur komið við sögu í sex leikjum liðsins á tímabilinu.