Sterkasti bíll í heimi

Volvo bílar hafa ávallt verið þekktir fyrir styrk sinn og mikið öryggi. Einhverjir hafa haldið því fram að Volvo 850 sé sterkasti bíll sem staðið hefur almenningi til boða.

Það vildi einn ágætur maður sanna og prófaði að klessa honum á marga tugi bíla í bílakirkjugarði. Sá Volvo 850 bíll sem notaður var til verksins er algerlega óbreytt wagon útgáfa bílsins með 2,5 lítra vél. Hafði honum verið ekið 483.000 kílómetra og því þjónað eigendum sínum vel.

Hann átti þó ýmislegt eftir því nær ógerningur var að eyðileggja hann þó svo endalaust væri ekið á aðra bíla, honum velt fjölmörgum sinnum og stokkið á honum og lent á öðrum bílum.

Bíllinn einfaldlega neitaði að gefast upp og forvitnilegt er að sjá í myndskeiðinu hvað hann þolir. Með þessu uppátæki hefur því líklega sannast að Volvo 850 er sterkasti bíll í heimi. Dirfska ökumannsins er einnig eftirtektarverð.