Aron Elís með sitt fyrsta mark | Sjáið markið og viðtalið eftir leik

Aron Elís Þrándarson opnaði markareikning sinn fyrir norska úrvalsdeildarfélagið Aalesunds FK í æfingaleik á móti b-deildarliði Kristiansund um helgina.

Aron Elís skoraði fyrsta mark leiksins en Aalesunds FK vann þarna 3-1 sigur á Kristiansund. Aron Elís var ekki eini Íslendingurinn í byrjunarliðinu því Daníel Leó Grétarsson byrjaði á hinum kantinum. Það er hægt að sjá mark Arons hér fyrir neðan en einnig viðtal við hann á heimasíðu félagsins.

„Þetta var betri hjá okkur en í síðasta leik en það eru samt hlutir sem við þurfum að bæta. Þetta var skref í rétta átt og nú förum við til La Manga þar sem að við getum bætt okkur enn frekar," sagði Aron Elís Þrándarson í viðtali á heimasíðu Aalesund en viðtalið fór fram á ensku.

Spyrillinn fékk Aron Elís til að lýsa fyrsta marki sínu fyrir Aalesunds FK. „Ég fékk boltann og sendi hann út á kant til Akeem (Latifu) og reyndi síðan að finna mér stað í vítateignum. Hann náði góðri fyrirgjöf, mér tókst að ná góðri fyrstu snertingu og kláraði síðan vel," sagði Aron Elís.

„Það var mjög góð tilfinning að skora fyrsta markið mitt fyrir félagið. Ég var búinn að bíða eftir þessu marki í tvo leiki en nú kom markið loksins og vonandi get ég skorað fleiri," sagði Aron Elís.

Liðið er nú að fara í æfingabúðir til suður Spánar.  „Það verður gott að breyta aðeins til og komast líka á náttúrulegt gras. Við mætum tveimur liðum úr úrvalsdeildinni og ég hlakka til þess," sagði Aron Elís en eins og áður sagði er hægt að sjá viðtalið og markið hans hér fyrir neðan.