Volkswagen seldi 4% minna í nóvember en Audi 11% meira

Sala Volkswagen bíla í nóvember var 4% minni í sama mánuði árið 2013, eða 508.400 bílar samanborið við 529.500. Dræm sala í austurhluta Evrópu og S-Ameríku dró söluna niður að þessu sinni. Sala Volkswagen minnkaði einnig í október, um 0,4% og stóð svo til í stað í ágúst og september.

Volkswagen segir að tilkoma nýs Passat hafi dregið niður söluna í nóvember, en kaupendur bíða eftir nýrri áttundu kynslóð bílsins, sem ekki er enn komin til söluaðila og kaupi því ekki eldri kynslóðina á meðan.

Salan í Rússlandi heldur áfram að minnka og er hún 20% minni en í fyrra ef allar bílgerðir eru taldar. Minnkun hjá Volkswagen í A-Evrópu nam 8% í nóvember. Þá minnkaði salan um 6% í N-Ameríku og um heil 18% í S-Ameríku. Salan í Kína jókst hinsvegar um 12% og er nú komin í 2,26 milljón bíla á árinu.

Audi gengur allt í haginn

Allt aðra sögu er að segja um systurfyrirtækið Audi, en sala þess jókst um 11% í nóvember og hefur sá mánuður aldrei verið betri í sögu fyrirtækisins. Heildarsala Audi á árinu er komin í 1,59 milljón bíla, sem einnig er met.

Mercedes Benz sló þó Audi við með 13% vexti í nóvember og hefur nú náð 1,49 milljón bíla sölu á árinu. Sala Audi bíla í Kína jókst um 19% í nóvember, en salan jókst aðeins um 2% í Evrópu. Sala Audi bíla í Bretlandi jókst um 22%, en hún minnkaði um 4% í heimalandinu Þýskalandi.