Meðferð er arðbær fjárfesting Mikael Torfason skrifar 10. maí 2014 10:00 Á morgun lýkur árlegri álfasölu SÁÁ en í tuttugu og fimm ár hafa samtökin selt álfa til að fjármagna starfsemina. Í ár er yfirskrift söluátaksins: „Álfurinn fyrir unga fólkið“ en söfnunin hófst formlega á miðvikudag og þá fylgdi sérstakt edrúblað SÁÁ með Fréttablaðinu. Formaður samtakanna, Arnþór Jónsson, ritaði grein í blaðið og sagði að allt söfnunarfé myndi renna til rekstrar unglingadeildar á Vogi. Hann benti einnig á að rannsóknir sýna að besta fjárfestingin í baráttu við ofneyslu vímuefna sé meðferð. Meðferð er til dæmis „mun arðbærari en lögregluaðgerðir, félagsleg úrræði og forvarnarherferðir“. Meðferð getur breytt öllu og á Íslandi eigum við ótal hetjusögur af fólki sem hefur snúið við blaðinu. Áfengis- og vímuefnasýki er að mörgu leyti þjóðarsjúkdómur Íslendinga. Nærri tveir af hverjum tíu karlmönnum á Íslandi munu einhvern tíma á lífsleiðinni fara á sjúkrahúsið Vog í afeitrun. Ein af hverjum tíu konum er líkleg til að feta sömu slóð og fá hjálp við að verða edrú. Í fyrrnefndri grein sinni á miðvikudag skrifar Arnþór að „fyrir hverja krónu sem sett er í meðferð við þessum sjúkdómi koma rúmlega sjö krónur til baka til samfélagsins. Þar af skila rúmlega tvær krónur sér til baka strax á fyrsta árinu.“ Við Íslendingar höfum alltaf tekið beiðni alkóhólista og SÁÁ um hjálp fagnandi. Vogur var til dæmis byggður fyrir söfnunarfé. Íslenska þjóðin lagðist á eitt og ákvað að styrkja alkóhólista og fjölskyldur þeirra og fjármagna byggingu á Vogi en sjúkrahúsið var tekið í notkun fyrir þrjátíu árum. Nú biðlar SÁÁ enn og aftur til þjóðarinnar en rekstur samtakanna hefur gengið verr eftir hrun. Þá lækkuðu fjárveitingar ríkisins til Vogs og SÁÁ og síðustu fimm ár hafa samtökin þurft að fjármagna sjálf um fimmtung af kostnaðinum við rekstur sjúkrahússins. Í fyrra nam upphæðin sem samtökin sjálf settu inn í reksturinn tvö hundruð milljónum og ekki þarf minna í ár en að sögn Þórarins Tyrfingssonar, yfirlæknis á Vogi, eru nú um þrjú hundruð manns á biðlista eftir meðferð. Þetta er „fólk í mikilli neyslu“, sagði Þórarinn í frétt Fréttablaðsins í gær. Í fréttinni segir enn fremur að lokanir hjá SÁÁ í sumar verði þær mestu í sögu samtakanna. Vík og Staðarfelli verður lokað frá 20. júní og fram í ágúst, auk þess sem göngudeildum í Reykjavík og á Akureyri verður lokað. Hjá SÁÁ vonast fólk eftir auknum fjárframlögum frá hinu opinbera svo samtökin geti hafið starfsemi af fullum krafti eftir sumarlokanir. En nú um helgina biðla samtökin til okkar allra að taka vel á móti álfasölufólki og styðja við bakið á unga fólkinu sem þarf á hjálp að halda. Viltu birta grein á Vísi? Sendu okkur póst. Senda grein Mikael Torfason Mest lesið Staða þorpshálfvita er laus til umsóknar Jón Daníelsson Skoðun Hvernig hljómar 100.000 kr. mánaðarlegur samgöngustyrkur? Valur Elli Valsson Skoðun Öryggi og varnir Íslands Kristrún Frostadóttir,Þorgerður Katrín Gunnarsdóttir,Inga Sæland Skoðun Frá Írak til Gaza: Hvað höfum við lært af lygunum og stríðsbröltinu? Helen Ólafsdóttir Skoðun Að reikna veiðigjald af raunverulegum aflaverðmætum Kristján Þórður Snæbjarnarson Skoðun Gerist þetta aftur á morgun? Ísak Hilmarsson Skoðun Auglýsingaskrum Landsvirkjunar Stefán Georgsson Skoðun Týndu hermennirnir okkar Bryndís Haraldsdóttir Skoðun Tími til að notast við réttar tölur Sigurjón Þórðarson,Eydís Ásbjörnsdóttir,Eiríkur Björn Björgvinsson Skoðun Ábyrg stefna í útlendingamálum Þorbjörg Sigríður Gunnlaugsdóttir Skoðun
Á morgun lýkur árlegri álfasölu SÁÁ en í tuttugu og fimm ár hafa samtökin selt álfa til að fjármagna starfsemina. Í ár er yfirskrift söluátaksins: „Álfurinn fyrir unga fólkið“ en söfnunin hófst formlega á miðvikudag og þá fylgdi sérstakt edrúblað SÁÁ með Fréttablaðinu. Formaður samtakanna, Arnþór Jónsson, ritaði grein í blaðið og sagði að allt söfnunarfé myndi renna til rekstrar unglingadeildar á Vogi. Hann benti einnig á að rannsóknir sýna að besta fjárfestingin í baráttu við ofneyslu vímuefna sé meðferð. Meðferð er til dæmis „mun arðbærari en lögregluaðgerðir, félagsleg úrræði og forvarnarherferðir“. Meðferð getur breytt öllu og á Íslandi eigum við ótal hetjusögur af fólki sem hefur snúið við blaðinu. Áfengis- og vímuefnasýki er að mörgu leyti þjóðarsjúkdómur Íslendinga. Nærri tveir af hverjum tíu karlmönnum á Íslandi munu einhvern tíma á lífsleiðinni fara á sjúkrahúsið Vog í afeitrun. Ein af hverjum tíu konum er líkleg til að feta sömu slóð og fá hjálp við að verða edrú. Í fyrrnefndri grein sinni á miðvikudag skrifar Arnþór að „fyrir hverja krónu sem sett er í meðferð við þessum sjúkdómi koma rúmlega sjö krónur til baka til samfélagsins. Þar af skila rúmlega tvær krónur sér til baka strax á fyrsta árinu.“ Við Íslendingar höfum alltaf tekið beiðni alkóhólista og SÁÁ um hjálp fagnandi. Vogur var til dæmis byggður fyrir söfnunarfé. Íslenska þjóðin lagðist á eitt og ákvað að styrkja alkóhólista og fjölskyldur þeirra og fjármagna byggingu á Vogi en sjúkrahúsið var tekið í notkun fyrir þrjátíu árum. Nú biðlar SÁÁ enn og aftur til þjóðarinnar en rekstur samtakanna hefur gengið verr eftir hrun. Þá lækkuðu fjárveitingar ríkisins til Vogs og SÁÁ og síðustu fimm ár hafa samtökin þurft að fjármagna sjálf um fimmtung af kostnaðinum við rekstur sjúkrahússins. Í fyrra nam upphæðin sem samtökin sjálf settu inn í reksturinn tvö hundruð milljónum og ekki þarf minna í ár en að sögn Þórarins Tyrfingssonar, yfirlæknis á Vogi, eru nú um þrjú hundruð manns á biðlista eftir meðferð. Þetta er „fólk í mikilli neyslu“, sagði Þórarinn í frétt Fréttablaðsins í gær. Í fréttinni segir enn fremur að lokanir hjá SÁÁ í sumar verði þær mestu í sögu samtakanna. Vík og Staðarfelli verður lokað frá 20. júní og fram í ágúst, auk þess sem göngudeildum í Reykjavík og á Akureyri verður lokað. Hjá SÁÁ vonast fólk eftir auknum fjárframlögum frá hinu opinbera svo samtökin geti hafið starfsemi af fullum krafti eftir sumarlokanir. En nú um helgina biðla samtökin til okkar allra að taka vel á móti álfasölufólki og styðja við bakið á unga fólkinu sem þarf á hjálp að halda.
Tími til að notast við réttar tölur Sigurjón Þórðarson,Eydís Ásbjörnsdóttir,Eiríkur Björn Björgvinsson Skoðun
Tími til að notast við réttar tölur Sigurjón Þórðarson,Eydís Ásbjörnsdóttir,Eiríkur Björn Björgvinsson Skoðun